Heimesjukepleie

Heimetenesta i Skjåk har lokale i same bygg som Skjåkheimen. Du finn oss på baksida av bygget i 2. etasje.

Her gjev vi medisinsk pleie og rettleiing til heimebuande som har kroniske lidingar eller treng hjelp i kortare periodar.

I same bygg ligg det òg 14 heildøgns omsorgsbustader som heimetenesta betener.

Skjåk kommune har eigen kreftkontakt. Tenesta er underlagt heimetenesta og bistår pasientar og pårørande i heile kommunen. Kreftsjukepleiaren gir støtte og hjelp til meistring av sjukdom, oppfølging før, under og etter behandling, og hjelp til symptomlindring i samarbeid med lege.

Ergoterapeut og tildelingskontor er òg lokaliserte i same bygg, noko som gir gode moglegheiter for hospitering i praksisperiodar.

Vi tek imot elevar, lærlingar og studentar innan helse- og sosialfag, og legg til rette for eit godt og lærerikt praksisopphald.

I heimetenesta vil du møte tilsette med variert kompetanse – både helsefagarbeidarar og sjukepleiarar med og utan vidareutdanning. Vi har fleire sjukepleiarar med vidareutdanning i rettleiing, noko som bidreg til god oppfølging og eit trygt læringsmiljø i praksis. I tillegg har vi ein sjukepleiar med vidareutdanning i kreftomsorg, som er kreftkoordinator i kommunen.

Vi har eit eige demensteam og eit dagaktivitetstilbod for personar med demens fleire gonger i veka, der fokuset er å skape gode augneblikk og meiningsfulle opplevingar.

Vi tilbyr kvardagsrehabilitering i samarbeid med fysioterapeut og ergoterapeut, der målet er å styrke brukarane si evne til å meistre eigen kvardag.

Vi har eit tett samarbeid med legekontoret når det gjeld sårbehandling og ulike prosedyrar, noko som gir gode moglegheiter for fagleg utvikling og praktisk erfaring.

Vi har stort fokus på førebygging og meistring, slik at brukarane kan bu lengst mogleg i eigen heim – noko som også gir studentar og elevar innsikt i heilskapleg og brukarorientert arbeid.

For at praksisperioden skal bli best mogleg, forventar vi at du:

• møter presis og er førebudd til avtala vakter
• gjev beskjed i god tid dersom du ikkje kan møte
• følgjer retningsliner for arbeidstøy og hygiene (hår, negler og smykke)
• viser respekt for bebuarar, pårørande og kollegaer
• er open, positiv og lærevillig
• tek ansvar for eiga læring og spør når du er usikker

Mat

• Skjåkheimen har kantine der du kan kjøpe lunsj og middag.

Arbeidstid

• Tredelt turnus: dag (07:45–15:30), kveld (15:00–22:30) og natt (22:15–07:45).

Arbeidstøy

•  Du får låne arbeidsuniform.
• Ta med gode sko og ta med ytterklede ved kaldt vêr.
• Vi har allværsjakker til utlån.

Kontaktinformasjon

• Adresse: Skeisvegen 1, 2690 Skjåk
• Sentralbord Skjåkheimen: 488 94 046
•  Avdelingssjukepleiar: 958 84 968