Tilrettelagde tenester i Vang kommune

Tilrettelagde tenester er delt i 2 soner i kommunen.
I tillegg til mange tenester som nyttes direkte i private heimar har me òg bukollektiv, avlastning/barneavlastning og arbeids/aktivitetssenter.
I tillegg finns andre roller som bistår i private heimar som til dømes personleg assistent.

Tilrettelagde tenester blir ytt til menneske med behov for bistand, utan omsyn til alder og økonomi, som bur eller har mellombels opphald i kommunen.

Tilrettelagde tenester er ei heildøgnsteneste. Tenesta gjev bistand til personar som ikkje greier seg sjølve i det daglege, og som har eit reelt behov for nødvendig helse- og omsorgshjelp.

Ein legg til rette for at innbyggjarane skal bli buande i eigen heim så lenge det er fagleg forsvarleg. Målet er å gje individuelt tilpassa tenester etter behov. Kvar enkelt skal har moglegheit for meistring  og sjølvstende i eiget liv.

Tilrettelagde tenester nyttar målretta miljøtiltak der det er behov. Dette er individuelt tilpassa. Brukarmedverknad står høgt i fokus, jamfør CRPD.

I teamet jobbar assistentar, helsefagarbeidare, sjukepleiare, miljøterapeutar og vernepleiarar. I tillegg er helsefagarbeidarar under utdanning og ein del av teamet.

Teamet jobbar tett saman med andre omsorgstenester, skule/barnehage, Habiliteringstenesten sjukehus Innlandet, PPT og BUP.

Du blir teken godt imot når du kjem i praksis hos oss. Våre rettleiarar legg vekt på å skape ein trygg og god læringsarena.

Døme på oppgåver i tenesta

• Hjelp til alle daglege gjeremål der ein treng bistand og tilrettelegging for å meistre kvardagen sjølv.
• Medikamenthandtering.
• Formidling av behov for hjelpemiddel.
• Kartlegging, fagleg vurdering og i gangsetting av tiltak. Rettleiing og evaluering. Utarbeiding og oppfølging av IP (Individuell plan).
• Nyttar dokumentasjonsverty som OMHU, Profil og ulik velferdsteknologi.
• Kollega-veiledning.
• Utarbeiding av eventuelle tvangsvedtak
• Kan inneha ansvar og oppgåver innan roller som koordinator og fagleg ansvarleg.
• Samarbeid med andre arenaer som arbeid/aktivitet, pårørande og spesialisthelsetenesten.

Kva for oppgåver du kan utføre i praksis, kjem an på om du er elev, lærling eller student, og kor langt du har kome i utdanninga di.

I Vang, som er ein distriktskommune, lærer du òg å arbeide sjølvstendig. Den som er vernepleiarstudent, vil erfare at faglege vurderingar som vernepleiar gjer, er viktige for å kunne kommunisere med ulike hjelpeinstansar.

• Så fort praksisen er planlagd får du kontaktinformasjon og informasjon om oppmøtestad.
• Du må sjølv sørgja for rette klede. Desse må vere praktiske og eigna for aktivitet.
• Verneutstyr er tilgjengeleg på arbeidssenteret.
• Du må sjølv sørgje for eigen mat.
• Tenestene våre blir delvis utførte spreidd over bygda. Bilsertifikat er viktig, men ikkje pålagt for dei som er i praksis.