Heimesjukepleie i Vang kommune

Heimesjukepleie er delt i tre soner. Kontoret er på sjukeheimen.

Heimesjukepleie blir ytt til akutt og kronisk sjuke, utan omsyn til alder og økonomi, som bur eller har mellombels opphald i kommunen.

Heimesjukepleie er ei heildøgnsteneste. Tenesta gjev hjelp til personar som ikkje greier seg sjølve i det daglege, og som har eit reelt behov for nødvendig helsehjelp.

Ein legg tilrette for at innbyggjarane skal bli buande i eigen heim så lenge det er fagleg forsvarleg. Målet er å gje individuelt tilpassa tenester etter behov, utan omsyn til alder, diagnose eller bustad i Vang.

Heimesjukepleie blir gjeve til personar utan omsyn til alder, som på grunn av funksjonshemming, sjukdom eller skade treng hjelp til pleie og omsorg.

I teamet jobbar helsefagarbeidarar og sjukepleiarar. Lærlingar i helsearbeidarfaget og erfarne assistentar er og ein del av teamet.

Teamet jobbar tett saman med, kortidsavdelinga, fysioterapeut, ergoterapeut og lege. Valdres legevakt er tilgjengeleg utover dagtid og i helgane.

Du blir teken godt imot når du kjem i praksis hos oss. Våre rettleiarar legg vekt på å skape ein trygg og god læringsarena.

Døme på oppgåver i tenesta:

• Hjelp til personleg stell
• Hjelp ved måltid
• Hjelp ved forflytting
• Hjelp til bruk av medikament (også intravenøs), injeksjonar, sårstell, stomistell, blodprøvetaking, m.m.
• Formidling av behov for hjelpemiddel
• Tilsyn og fagleg vurdering
• Rettleiing til personar og pårørande i høve til demens, andre diagnoser eller livssituasjonar
• Utrykking ved bruk av tryggleiksalarm
• Stell og pleie i heimen ved alvorleg sjukdom
• Heimesjukepleia kan og yte hjelp til ei verdig livsavslutning

Kva for oppgåver du kan utføre i praksis, kjem an på om du er elev, lærling eller student, og kor langt du har kome i utdanninga di.

I Vang, som er ein distrikskommune, lærer du å jobba sjølvstendig. Den som er sjukepleiarstudent, vil erfare at faglege vurderingar som sjukepleiar gjer, er viktige for å kunne kommunisere med lege eller sjukehusbehandlar som er langt unna.

• Heimesjukepleie har kontor på sjukeheimen
• Så fort praksisen er planlagd får du kontaktinformasjon og informasjon om oppmøtestad.
• Du får låne arbeidsklede, men du må ta med eigne sko.
• Du må sjølv sørgje for eigen mat.
• Tenestene våre blir delvis utførte spreidd over bygda. Bilsertifikat er viktig, men ikkje pålagt for dei som er i praksis.